Hoekom het koning Leeu dan so baie hare?

  (Om na hierdie storie te luister, laai die mp3 gratis af.)

  Het jy al ooit gewonder hoekom koning Leeu so baie hare het? Wel as jy het, dan is jy nie alleen nie. Dit is presies waaroor koning leeu se seun ook gewonder het. Sy naam was Leonov en hy het nogal gewonder oor baie dinge.

  Leonov het gewonder hoekom gras dan nie vir hom lekker was nie. Samie die Springbok het dan so baie van gras gehou. Hy het gewonder of hy ook sal kan boomklim soos Mjanji die apie as hy dalk net baie oefen. Leonov het gewonder of hy sal kan leer vlieg soos sy vriend Rento die arend. En dan het hy ook natuurlik gewonder hoekom sy pa Leon dan so baie hare het?

  

  Leonov vra toe maar sy ma daaroor. Sy ma sê toe dat sy pa se maanhare, dis nou die groot boskaas hare rondom sy pa se nek en kop, hom koninklik laat lyk. Leonov was nie so seker of dit die regte antwoord was nie, so toe gaan vra hy vir ou Oom Krokodil ook. Oom Krokkie was al oud en slim so hy sou sekerlik weet, het Leonov gedink. Oom Krokkie sê toe dat koning leeus maar nog altyd so gelyk het en dis hoekom dit so moet wees. Weer was Leonov nie tevrede met die antwoord nie.

  Volgende gaan vra hy toe vir sy juffrou by die skool. Juffrou Angelina die Uil was baie slim. Sekerlik sou sy tog die regte antwoord ken? Juffrou Angelina het verduidelik dat koning leeus nie altyd so baie hare gehad het nie, maar dat dit een winter vreeslik koud was en toe het die koning leeu van daardie jare besluit om serpe te begin dra. Die volgende winter, toe het die koning leeu sommer sy eie serp gegroei en tadah! so was dit nog altyd van toe af. Leonov het nogal baie van hierdie verklaring van juffrou Uil gehou maar dit kon tog nie waar wees nie, of hoe?

  Leonov besluit toe om vir sy pa self te gaan vra.

"Pa? Ek het iets waaroor ek nou al lank wonder."

"Maar ek ken jou mos so Leonov. Hahaha! Waaroor wonder jy vandag?"

"Ag ek het maar net gewonder hoekom pa so baie maanhare het? Ek het nou al vir ma en vir Oom Krokkie en vir juffrou Uil gevra. Maar ek dink nie hulle weet regtig nie."

"Seun, ek moet jou sê, ek dink ook nie ek gaan vir jou 'n goeie antwoord kan gee nie. So kom ek vra jou eerder 'n vraag. Hoekom wil jy so graag weet?"

"Dink pa ek gaan ook eendag sulke maanhare hê?"

"O beslis! Jy is 'n ware leeu en jy gaan koning wees soos ek...."

  Koning leeu sien op Leonov se gesig dat hy nie baie gelukkig lyk met die antwoord nie.

"En nou Leonov? Ek dog jy sal bly wees oor hierdie antwoord?"

"Ja... maar pa weet mos... ek hou niks van hare was nie!"

  Leonov en sy pa het lekker saam gelag oor hierdie een! En wat van julle? Hou julle van hare was?